Etapa 17 - Olloniego-Oviedo

Carne y pescáu, potes tradicionales y guisos ellaboraos, bon vinu y sidra, y, claro, postres. Uviéu tuvo siempre paladar finu . La capital del Principáu ye, ensin dulda, una de les zones asturianes onde mayor entendimientu culinariu existe, lo que se traduz n’esixencia y, polo tanto, en bon comer. La carta sobre la qu’escoyer ye estensa: fabada, pote, merluza a la cazuela, carne gobernao, pataques y verdura, callos al estilu Uviéu, corderu... y, pa rematar, frixuelos, casadielles, arroz con lleche y, por supuestu, carbayones. La gastronomía uviedina tien delles cites destacables como’l pote d’Antroxu, compuestu por pote, frixuelos, arroz con lleche y casadielles, o’l Desarme. Esta fiesta culinaria desenvuélvese’l 19 d’ochobre pa conmemorar la rindición, en 1836, de les tropes carlistes del xeneral Sanz. El menú d’esi día compónse de garbanzos con bacaláu y espinaques, callos a l’asturiana, arroz con lleche y frixuelos.

Les propuestes festives d’Uviéu algamen el puntu culminante en setiembre coles fiestes de San Mateo, nes que, en dellos díes, la capital asturiana conviértese en pura fiesta combinando les actuaciones musicales multitudinaries coles representaciones teatrales y operístiques más selectes. Nestes fiestes, concretamente’l 19 de setiembre, celébrase’l Día d’América n’Asturies, d’Interés Turísticu Nacional. Trátase d’un desfile de carroces, homenaxe a los emigrantes asturianos, nel que participen grupos folklóricos autóctonos y iberoamericanos. L’axenda festiva uviedina tien tamién marcáu en bermeyu’l Martes de Campo o Balesquida. Celébrase’l martes siguiente al domingu de Pentecostés, n’agradecimientu a doña Velasquita Giráldez, qu’en 1232 donaba a los probes, ente otros bienes, la casa que güei acueye la capiya de La Balesquida. De gran enraizamientu popular, el Martes de Campo saca a miles d’uviedinos a los parques y zones verdes de la ciudá pa tastiar el bollu preñáu y el vinu típico d’esta xornada. Hai que destacar, a lo último, na capital d’Asturies, la Feria de l’Ascensión a finales del mes de mayu, un homenaxe al campu qu’incluye dende concursu de ganáu hasta exhibición de deportes autóctonos pasando pela canción asturiana y les muestres d’artesanía. Una fecha que tamién se convierte en referencia gastronómica con un menú compuestu por menestra de verdures, carne gobernao y tarta de quesu.