Etapa 20 - Casquita-Siero

La Ruta de la Costa de la que pasa pel conceyu de Villaviciosa ufierta la posibilidá d’esviase a la ciudá d’Uviéu. Esta alternativa, que quiciás escoyeríen munchos pelegrinos, dada la gran atracción que tenía’l relicariu de San Salvador custodiáu na capital asturiana, empieza nel llugar de Casquita, unos tres quilómetros depués de Villaviciosa. El trazáu xacobéu biforca al pie de la capiya de San Blas. Dexando a la derecha’l ramal qu’empobina pa Xixón, gárrase’l de la esquierda que, cuasi siempre en coincidencia cola carretera, crucia El Ríu Valdediós y xube a los llugares d’El Pulu Baxu y El Pulu Riba.

Al llegar a una vuelta mui zarrada de la carretera, el Camín caltién dirección suroeste y, de frente, pasa per La Riega y xube a Castiellu. Equí, depués de dexar a la derecha la carretera que va a Conceyeru y Rozaes, pon rumbu sur remontando la lladera per La Brimera y La Venta.

Al pie de la ilesia de San Pedru, el Camín apiégase a la carretera rexonal AS-113 unos 100 metros, qu’al pasalos intérnase, a la esquierda, ente les cases d’Ambás. En xubida, dexa a la derecha’l llugar de Lloses y curiando la lladera del monte del mesmu nome llega a Arbazal.

Depués d’una xubida curtia a la salida d’esti llugar, el Camín sigue faldiando hasta entroncar cola carretera de Nava, pela que se sigue, a la derecha, hasta l’altu de La Campa.

Ensin salir a la carretera AS-113, avánzase en paralelo a ella unos 200 metros, cruciándola de siguío. Poco depués gárrase un camín que s’abre a la derecha; n’acabando síguese la carretera hasta la localidá de Figares, a la que s’entra per una esviadura a la esquierda.

Báxase ente les cases hasta garrar la pista que, con dirección suroeste, tira pa Pedrosa, yá nel alcuentru cola carretera SR-1 (Vega-San Román). Per ella, pasando per La Carcavá -na intersección cola rexonal AS-113- llégase a Vega, capital del conceyu de Sariegu, onde abre les puertes un albergue de pelegrinos.

Ensin perder el rumbu a poniente y en coincidencia cola carretera, el Camín empobina a La Pola Siero; atrás van quedando les aldees y caseríes de La Venta, Barbechu, La Torre y El Romeru -nel conceyu de Sariegu-, y les d’El Castru, Aveno, La Venta, Samartino, El Rayu y El Rebollal -nel de Siero-.