Etapa 5 - Ribadesella-La Espasa

Crúciase la villa, y pela ponte sobre’l Sella, bordiando depués la ribera esquierda de la ría, llégase hasta l’arenal de Santa Marina. El trazáu avanza dende la cai Ricardo Cangas per un tramu asfaltáu, de dirección oeste, hasta Llama y Abéu.

Al cruciase cola carretera que lleva pa Lleces, onde hai un albergue de peregrinos, el Camín sigue derecho, per El Calerón, pa contra Vega, siguiendo la base d’El Monte Redondu pa, en cruciando El Ríu l’Acebu na playa de Vega, entamar la xubida a Berbes.

Per ella éntrase nel conceyu de Caravia, xubiendo la lladera sur de La Campona hasta’l colláu del mesmu nome, pa baxar depués hasta L’Arenal de Morís.

Síguese pela carretera que xunta esta playa con Prau, capital del conceyu de Caravia, trazáu que s’abandona unos 400 metros depués pa siguir per un camín qu’entama a la derecha y va, contra l’oeste, arrimáu a la mar hasta llegar a la playa de La Espasa; dende ella algámase la carretera N-632, crúciase’l ríu y pásase la venta vieya de La Espasa.