Etapa 7 - Sebrayo-Niévares

Avánzase pela carretera contra Villaverde un quilómetru aproximao y gárrase un esvíu a la esquierda que lleva a El Fresnu y El Sellu, pa baxar depués al calce del regueru de Miyares, pasar per delantre de La Estrada y travesar la parroquia de Santa Olaya de Carda.

El trazáu entronca cola N-632, pela que se sigue hasta la entrada en Villaviciosa per Les Caleyes y la cai Magdalena.

Saliendo per La Torre, el Camín pasa apegáu a El Ríu Valdediós, pel parque de L’Alameda, y llega a Amandi, onde garra la carretera de L’Infiestu. Unos metros depués ésviase a la derecha, en La Regatina. Crucia la ponte de San Xuan escontra La Parra y, a pocos metros, garra a la derecha la carretera de Rozaes hasta Casquita, onde la capiya de San Blas marca’l biforcu del Camín pa Uviéu o pa Xixón.

Si s’escueye siguir pa Xixón hai que tirar de frente unos 400 metros, y garrar una esviación a la esquierda. Crúciase El Ríu Valdediós y síguese hasta’l molín d’El Mayorazu.

Dende equí’l Camín sigue hasta Les Vallines, pero’l corte provocáu pola autovía del Cantábricu aconseya garrar un camín alternativu; pue usase’l que sal pa Grases de Riba, al norte, y entronca al poco cola carretera de Rozaes, que s’ha siguir, a la esquierda, hasta la esviación a Niévares.