Busto-Vidiago

El trazáu costeru entra n’Asturies pela ponte interprovincial sobre El Ríu Deva pa llegar a Bustio y siguir nuna xubida empinada pela cuesta del camín d’El Cantu, que salva’l desnivel qu’hai ente Bustio y Colombres.

Traviésase Colombres y gárrase’l camín que con dirección noreste baxa a la fonte de Las Concharascas y acaba n’El Bau. Enllázase cola N-634 hasta La Franca, onde entama la baxada contra la ponte d’El Campu pela carretera local de Los Cándanos.

Depués de cruciar El Ríu Cabra xúbese hasta la redolada de Santiuste, onde se llega a la N-634, qu’hai que siguir unos 150 metros hasta esviase a la esquierda per una pistuca escontra la Casa del Pintor.

A unos 30 metros al oeste d’ésta, vuelve garrase’l trazáu vieyu, que va ente murios pel pie del monte de la Sierra Plana de la Borbolla hasta entroncar otra vez cola carretera nacional que lleva a Buelna.
El Camín sepárase de la carretera en Pendueles, cerca de la ponte del ferrocarril, y traviesa’l barriu de La Venta contra la Ilesia de San Acisclo y Las Cocheras,  onde vuelve garrase una vez más la N-634, que lleva pa Vidiago.