Niévares-Gijón

Asset Publisher

Etapa 8 Niévares (Villaviciosa) - Gijón (Gijón) 8,2 km

Recorrido

Xúbese pela carretera de Niévares hasta una curva bien zarrada de la que sal, a la esquierda, el camín que per Fernándiz lleva pal cordal de Pión. Primero de rematar la xubida, salse a la carretera VV-8, que se sigue, a la esquierda, hasta’l colláu de La Cruz.

Pa llegar al valle de Pión síguese pela carretera unos 2,5 quilómetros y gárrase un camín a la esquierda que baxa a Casamoria y La Venta. Volvemos entroncar cola carretera, que se sigue hasta cruciar El Ríu España en Llantáu y algamar Bárcena, unos 400 metros depués. D’equí sal un camín que, con rumbu noroeste, remonta la lladera hasta’l colláu d’El Curviellu.

A la baxada, el Camín sepártase de la carretera de L’Infanzón, siguiendo per una pista a la derecha la baxada a La Olla, na parroquia de San Salvador de Deva. Síguese’l trazáu hasta El Mirador, onde se crucia la carretera AS-331, pela que s’avanza unos metros a la esquierda pa volver a una pista qu’entama una baxada rápida pela cuenca d’El Ríu Peñafrancia.

Salse entós a la N-632, na redolada del camping de Deva, que se dexa unos 50 metros depués, con rumbu norte, per L’Estanco y La Pontica, pa metese na parroquia de Santa Olaya de Cabueñes. Pasa per Les Cruces, cerca de la residencia sanitaria y la Universidá Llaboral, sigue per Fuexo y Villamanín, dende onde s’enllaza cola carretera de La Guía. Éntrase nel cascu urbanu xixonés pela carretera de la Costa hasta Begoña y, d’equí, empobina pal barriu de Cimavilla.

Les referencies históriques alluguen en Xixón un hospital de pelegrinos que, nel sieglu XVIII, diba pasar a llamase de la Virxe de los Remedios, advocación que caltién la que fore la capiya, edificiu apegáu a la casa natal de Xovellanos, onde reposen los restos del ilustráu xixonés.

Folklore & Tradiciones

Los productos de la mar chisquen bona parte de la carta gastronómica de Xixón, tan rica. Dende la merluza, la ventrisca de bonitu, el pixín allagostáu, la llubina a l’asturiana o’l besugu a la espalda hasta’l platu más representativu: la caldereta de pescaos y mariscos. La güerta ufierta’l complementu cola fabada y el conocíu pote asturianu. Nel apartáu de postres, dos especialidaes son les más aponderaes, la charlota y la tarta xixonesa.

La ufierta lúdico-festiva de la capital de la Costa Verde nun dexa a naide indiferente. Reparte a lo llargo l’añu abondes cites interesantes anque, como cuasi siempre, les más multitudinaries concéntrense alredor de los meses del branu. Por mentar namás les más conocíes, l’Antroxu xixonés (fiesta considerada d’Interés Turísticu Rexonal), la Selmana Negra, el Día d’Asturies en Xixón, celebráu’l primer domingu d’agostu (considerada d’Interés Turísticu Nacional), el Festival Folklóricu Internacional o la Selmana Grande de Xixón, a mediaos d’agostu.

Alojamiento