Etapa 3 - Poo-Nueva

En pasando Po y el regueru Vallina, avánzase pela carretera unos 800 metros pa garrar l’esvíu, a la derecha, que lleva al monesteriu de San Salvador de Celoriu.

El Camín arrodia la playa de La Palombina y enllaza con una pista que se sigue hasta Barru, onde se xunta cola carretera local que sigue pa contra’l ríu de Niembru.

Depués de cruciar una ponte, gárrase, al pie de la capiya d’El Santín, la cuesta de Niembru pa, a lo último, cruciar una carretera local y siguir pal oeste hasta l’altura d’El Valle, onde se garra, a la derecha, el camín del Mar que, en pasando L’Amiaderu, baxa mui pindiu hasta’l monesteriu de San Antolín de Beón.

Crúciase El Ríu Beón pela carretera y síguese per ella hasta atopar l’esvíu a Naves. Traviésase’l llugar y síguese hacia Villaḥormes, onde se garra’l camín del cementeriu y, a unos 500 metros de La Riega Llagañas, la pista que, a la esquierda, lleva a La Venta.

Avanzando pa contra l’oeste llégase a la ponte de Güerbu sobre El Ríu Santuciliu, y pocos metros depués gárrase una esviación a la esquierda que lleva hasta Nueva.