Nueva-Ribadesella

Asset Publisher

Etapa 4 Nueva (Llanes) - Ribadesella (Ribadesella) 8,3 km

Subida a San Pedro de Pría

San Esteban de Leces

Villa Rosario (arenal de Sta Marina)

Recorrido

De Nueva salse pela carretera AS-263 y cruciando la nacional per un pasu baxo nivel llégase a Piñeres; tuércese a la esquierda y pásase mui cerca del albergue de pelegrinos. De frente, enllázase cola carretera de La Pesa, que se sigue, a la derecha, a lo llargo d’unos 300 metros hasta llegar al camín que s’abre a la esquierda y lleva a la ilesia de San Pedro de Pría.

Báxase pel camín que sal de la ilesia con dirección norte hasta aportar a una pista que lleva a La Pesa; equí tuércese a la esquierda y enllázase cola carretera de Llames. Tuércese otra vez a la esquierda y, a unos 300 metros, otru xiru a la derecha lleva a la ponte de L’Aguadamía. De frente, xúbese hasta Cerecera en Cuerres, y crúciase la vía del tren, siguiendo pela carretera a Toriellu.

Dende Toriellu, el Camín sigue pal noroeste, crucia la vía del tren y en llinia cuasi recta traviesa Sobares, Argunadiellu y La Espina, onde se crucia la vía férrea y dalgo más allá, l’AS-263, siguiendo pel tramu que pasa pel campu de fútbol y per esa carretera hasta El Portiellu y Ribeseya.

Folklore & Tradiciones

Güerta y mar, carne y pexe; variedá, nuna sola palabra. La riqueza culinaria de Ribeseya abre boca a desganaos y deleita a entendíos. Los sos productos esenciales vienen de la mar, del Cantábricu, onde rescampla la merluza del pinchu (pescada con anzuelu). A ella axúntense’l besugu, la roballiza, el birréi, el llinguáu o, pel branu, el bonitu, los calamares y les sardines. La preba de bona parte d’estos pescaos pue facese nes Xornaes Gastronómiques que se celebren tolos años na villa pela primavera. Nelles nun falta tampoco la muestra de l’angula y el salmón del Sella y del mariscu local como les percebes, les andariques o los centollos.
Entrando yá en tierra firme, la gastronomía ribeseyana ufierta pote y fabada, carne gobernao y escalopinos a la sidra, por nun falar d’una gama de quesos bien variada, como lo de Cabrales, Pría, Gamonéu, Vidiago o lo casín y lo d’afuega’l pitu. El meyor escaparate pa prebalo alcuéntrase na localidá de Cuerres, que celebra nel mes d’agostu la feria del quesu de San Mamés. El ramu culinariu pónenlu los postres: arroz con lleche, casadielles, lleche frito, compota de manzana o dulce casero. Y too ello regao con llicor y aguardiente que se fai en Collera. A too esto, l’aguardiente de sidra d’esti llugar recibió’l reconocimientu a la calidá por parte de la Unión Europea.
El calendariu festivu de Ribeseya tien una cita bien grande en colorao: el Descensu Internacional del Sella, reconocíu como d’Interés Turísticu Internacional. Celébrase’l primer sábadu d’agostu anque la fiesta entama de xueves col tradicional Izáu de Banderes Autonómiques. Les nueches del xueves y del vienres les verbenes ponen la nota de color a les cais ribeseyanes enantes de dar el sábadu’l pistoletazu de salida a la Fiesta de les Piragües. Pero la villa del Sella nun queda ehí. Otres cites festives foron ganando protagonismu como la de la Virxe de la Guía, el primer domingu de xunetu, o la de Santa Marina, a últimos del mes d’agostu. Y con elles podía destacase la Carrera de Caballos "Playa de Ribeseya" que se fai en Vienres Santu, y el Festival Folklóricu del Oriente d’Asturies, nel mes de agostu.

Alojamiento