Campiello-Fonfaraón
Etapa 6 Campiello (Tineo) - Fonfaraón (Allande) 12,6 km
Recorrido
Ensin variar la trayectoria, síguese escontra El Freisnu y L’Espín. Equí biforca la carretera y hai que siguir pela derivación de la esquierda, con dirección a Preda, hasta una curva zarrada de la que sal un camín, a la derecha, que lleva a Bourres, onde hai un albergue de pelegrinos.
El Camín trespasa Bourres y, desque se crucia l’AS-219, xube a les cases no cimero del llugar. Sigue con rumbu suroeste hasta’l paraxe de La Solana, en términos de San Brismu, llugar onde’l Camín de Santiago biforca: el ramal de la derecha lleva a La Sierra de Fanfaraón o Los Hospitales, y el de la esquierda, a La Puela. Dambos trazaos vuelven axuntase nel puertu d’El Palu, unos 12 quilómetros depués.
Por ser la ruta de más antigüedá descríbese primero’l percorríu del Camín de los Hospitales. Ésti, en xubida, bordia l’altu d’El Picón y conecta, depués d’una baxada, cola carretera de Santiáu, que sigue, a la derecha, unos 100 metros hasta algamar un camín a la esquierda que lleva al barriu altu de La Mortera.
Dexando la capiya de San Pascual a la esquierda, remonta la cabecera del ríu de La Mortera hasta’l colláu qu’hai ente los picos de Cabornu y Tableiros; crucia en dirección suroeste y baxa hasta otru colláu onte tán les murueques del que quiciás foi l’hospital de pelegrinos de La Paradieḷḷa.
Xúbese nuna cuesta pindia per un senderu que, dexando delles pistes a la esquierda, llega a La Campa la Braña y, calteniendo la trayectoria, a La Ḷḷaguna. Equí’l Camín va pelo llano y, curiando pela esquierda El Picu L’Hospital, avérase a los restos del que foi hospital de Fanfaraón.
Folklore & Tradiciones
Les Xornaes Gastronómiques de Tinéu fáense’l segundu fin de selmana de febreru y son, de xuru, ún de los meyores escaparates pa gozar de la cocina tan rico d’esti conceyu del occidente asturianu. El so platu principal ye’l pote de berces, acompañao pol tradicional compangu de chorizos, llacón, tocín, y rabu y oreya de gochu. La zona ye tamién abondosa n’empanaes, embutíu, ente lo que resalta’l choscu y el botiellu, y en platos tresnaos a partir de la caza, por exemplu, de xabalín. A ellos hai que sumar les truches tostaes con xamón y, pa zarrar, el bizcochu borracho d’ablana, los frixuelos o l’arroz con lleche.
El conceyu de Tinéu presenta dos fiestes d’Interés Turísticu Rexonal: la de San Roque, el 16 d’agostu, n’honor al patrón local; y el Día de los Pueblos d’Asturies, que se desenvuelve en Navelgas, el postrer domingu del mes d’agostu. Esta xornada festiva impulsóla’l pintor y escultor local Manuel García Linares pa intentar fomentar la hermandá ente los pueblos del Principáu. El capítulu festexeru complétase cola Feria Forestal Asturforesta, les feries ganaderes de San Blas, San Francisco, San Xosé y de Tolos Santos, y les fiestes de San Pedro o Santa Bárbara.