Gijón-Tabaza

El Camín de Santiago sal de Xixón per El Natahoyo, Cuatrocaminos y La Calzada, coincidiendo cola cai Mariano Pola y les aveníes de Galicia y d’Arxentina; desque se pasa ésta, sigue pela carretera de Xixón a Avilés hasta El Puente Secu.

Síguese la carretera a la derecha hasta’l ramal que lleva a Puao, a la esquierda. Pasada l’azucrera de Veriña, la carretera tuerce a la derecha empezando la xubida a El Monte Areo. Síguese per ella aproximao 1,5 quilómetros hasta un esvíu a la derecha que s’adientra nes cases espardíes de Puao y crúciales hasta llegar al picu del monte.

Entra’l Camín nel conceyu de Carreño pel estremu sureste del monte de La Llana, que se crucia, siempre con rumbu oeste, hasta l’altura de San Pablo, que les sos cases tán al norte del trazáu. Síguese per una pista de dirección suroeste unos 500 metros hasta enllazar con otra, a la derecha, que con sen oeste empobina al llugar de Ramos. Pasáu esti, gárrase a la esquierda un camín que baxa nuna cuesta empinada hasta Santolaya.

Yá nel valle, dexando a la derecha la ilesia parroquial, síguese de frente hasta La Maquila, onde se garra un esvíu a la esquierda pa siguir per La Torre y, torciendo al noroeste, baxar a Tamón. Xunto a la ilesia, el camín tresfórmase na carretera que lleva a Tabaza, xuntándose nesti sitiu cola N-632, que se sigue unos ocho quilómetros hasta Avilés.