Granda-Oviedo

Desque se pasa ente la ilesia de San Pedro de Granda y el cementeriu, síguese derecho, con dirección noroeste, escontra El Llugarín y el polígonu industrial hasta desembocar na carretera N-634.
Síguese per ella unos 250 metros, dexándola pa garrar un camín, a la esquierda, que lleva a la ponte medieval de Cualloto.

Franquiando El Río Nora, el trazáu xacobéu vuelve xuntase a la carretera unos metros hasta la entrada, a la esquierda, de la cai Luis Suárez Ximielga, pela que se dexa’l conceyu de Siero y s’entra nel d’Uviéu travesando Cualloto.

A falta de poco más de trés quilómetros pa llegar a la catedral de San Salvador d’Uviéu, el Camín de Santiago vuelve solapase cola carretera N- 634, qu’entra nel cascu urbanu uviedín per Cerdeño y les cais de La Tenderina de Baxo y de Riba.

El trazáu desemboca na plaza actual d’El Campo la Vega. De frente, per onde antaño s’abría la puerta de La Noceda na cerca medieval, remóntase La Cuesta la Vega y depués, a la esquierda, la cai de San Vicente.

La Corrada l’Obispo y el Tránsitu de Santa Bárbara enmarquen los pasos finales d’esti itinerariu a Santiago de Compostela, unión ente la Ruta de la Costa y el Camín Primitivu.