Mieres-Olloniego
Etapa 16 Mieres (Mieres) - Olloniego (Oviedo) 9 km
Recorrido
En travesando Mieres, el trazáu coincide otra vez cola carretera AS-242 (Uviéu - Campumanes), qu’abandona’l valle en busca del altu d’El Padrún. Marquen el pasu del Camín les localidaes de La Peña, La Rebollá, El Rollu, Copián, Aguilar y, yá na divisoria col conceyu d’Uviéu, El Padrún.
Nesti puntu déxase la carretera y gárrase un ramal, a la derecha, que baxa al llugar de Casares. El Camín sigue de frente, pero la perda d’un tramu más p’alantre obliga a garrar l’alternativa que s’abre a la esquierda, a l’altura de les primeres cases, y unos 100 metros depués tuerce a la derecha pa dir otra vez a la carretera. Síguese per ella, a la derecha, llegando a Lluniego en travesando una pasarela sobre l’autovía y el tendíu férreo.
Folklore & Tradiciones
La variedá ye la tónica dominante na gastronomía de la cuenca del Caudal. A los típicos platos asturianos como la fabada o’l pote, Mieres añede arbeyos con xamón, fabes con uña de gochu, pitu de caleya, menestra o chorizu a la brasa. De postre, amás del quesu d’Urbiés que comparte con Ḷḷena, Proaza, Quirós, el valle de Turón, Teberga y Somiedu, presenta como especialidaes la tarta Dalia y les casadielles de Cuna.
Ente les fiestes programaes nel conceyu destaca la Romería de los Mártires de Cuna, que se celebra nel mes de setiembre y que foi declarada d’Interés Turísticu Nacional. Trátase d’una romería tradicional na que los participantes xuben hasta la ilesia de los Mártires, San Cosme y San Damián, onde hai misa, puya del ramu y comida de prau. Nun ye ésta, sicasí, la única referencia festiva de la zona. La folixa de Primavera, que xunta música folk y teatru na cai, la fiesta d’El Carme, la de San Xusto y San Pastor, la del Monte La Teyerona, la Vaquera nel monte Ḷḷusuriu o la del Coḷḷáu d’Urbiés repártense a lo llargo del añu como celebraciones d’interés pa los del llugar y visitantes.
Alojamiento
- HS** Villa de Mieres (Mieres)