Piedras Blancas-Muros

Yá en Piedrasblancas, el trazáu crucia l’avenida de Xixón y sigue pela carretera que lleva a Villar, onde se garra, a la esquierda, la pista que xube a la xerra d’El Cordel y continúa pela so exa con dirección suroeste.

A l’altura de La Lloba tuerce al oeste y depués d’unos 400 metros empieza la baxada pela lladera hasta La Ventaniella n’El Monte, sitiu a onde se llega desque se crucia El Ríu la Ferrería.

D’El Monte empobina pa El Cueplu per un tramu qu’empieza na carretera que tira camín del aeropuertu.

Desque se pasa El Cueplu, en términos del conceyu de Sotu’l Barcu, xube hasta la rasa del mesmu nome, pa siguir pel altu con rumbu oeste, dexando dellos encruces a los llaos, ensin qu’haya que s’esviar per nengún d’ellos hasta que na confluencia de delles pistes empieza una baxada suave; hai que garrar entós el camín de rumbu noroeste y más tarde suroeste que lleva a la escontra de la carretera de L’Arena, desque se crucia una ponte vieya. Pola mor de los munchos caminos que traviesen l’altu, ye aconseyable nun perder el rumbu y tar sollerte a la señalización.

Xúbese al llugar d’El Castillu per una rampla que s’abre a la derecha de la carretera. Como nun ye posible cruciar El Ríu Nalón en barca, como antaño, ye menester empobinar dende equí a Sotu pel camín vieyu y garrar, desque se pasa la rotonda, el trazáu de lo que yera la carretera nacional que lleva a la ponte perriba del Nalón.

Yá na otra oriella gárrase un camín a la esquierda de la N-632 que xube a Era. Depués, y desque se crucia la mesma carretera, el Camín xube a la capital del conceyu de Muros de Nalón.