Río de Seares-Santiago de Abres

Desque se crucia El Río de Siares, el Camín, otra vez asfaltáu, avanza pela lladera oeste del Pico de Cabaleiro pasando A Casía y Presa. Adiéntrase en términos d’A Veiga al altor de Meriye, y pel barriu d’A Galea, allugáu nuna cuesta mui empinada, el trazáu desemboca na oriella derecha d’El Río Suarón, que se crucia escontra’l mediu d’A Veiga.

El Camín dexa la capital del conceyu, desque se pasa El Río Monxardín, xubiendo pel barriu de Ferreira y sigue faldiando hasta’l llugar d’A Cruz, al sur de Miou.

Dexando a la derecha’l camín de Louteiro, avánzase pel camín real de Bustelo, que, con dirección suroeste, crucia El Rego de Louteiro nel vau d’As Cabanas, y xube al colláu d’A Sela de Murias. Nél dase la xuntura de delles pistes, teniendo qu’avanzar pela que, a la derecha, cai escontra’l valle del Eo con rumbu xeneral suroeste.

El Camín crucia Abres diendo per O Pebidal, O Casal y A Rúa. Resalvaba l’Eo n’As Acías per A Ponte Vella; desapaecida ésta, el pasu a la vecina Galicia faise pela ponte d’O Fornacho.