Salas-El Predegal

Dexa’l Camín la capital del conceyu de Salas, onde hai un albergue de pelegrinos, pela plaza de La Campa y la cai Ondinas. Emboca’l llamáu Camín de Paín que, paralelu al cursu del Nonaya, xube hasta El Llanón, puntu onde’l trazáu solápase cola N-634 hasta llegar a un esvíu a la esquierda qu’encara la xubida contra Porciles.
Con rumbu suroeste, cuasi paralelo a la carretera N-634, el Camín avérase a Boudenaya, dexa a la esquierda la ilesia de Santa María y crucia la carretera, pa siguir perriba d’ella hasta La Espina, onde vuelven atopase.
Síguese pela carretera, en dirección a Tinéu, unos 400 metros aproximao; pasáu El Cándanu, gárrase un camín a la derecha que lleva a La Preda. Desque se dexa atrás la capiya del Cristu de los Aflixíos, tuércese a la derecha y per una cuesta pindia llégase al barriu de Reconcu. Depués de bordiar una vaguada gárrase un esvíu a la derecha que, calteniendo dellos segmentos empedraos, xube a Las Matiegas. N’adelantre, el Camín sigue faldiando a media lladera con orientación xeneral suroeste: traviesa Bedures, pasa perriba de La Miariega, bordia La Güérgula y, ensin baxar a la carretera, pasa per El Pedregal.