Samblismo-Puerto del Palo

Pela so parte, el ramal del Camín de Santiago qu’empobina a La Puela baxa dende La Solana a San Brismu, crucia l’AS-219 y, per debaxo d’ella, tuerce a la derecha. N’acabando un trechu asfaltáu, garra un esvíu a la derecha que sigue un zarru de finques. Empobina pal nucleu más baxu de La Mortera, traviésalu y, bordiando la cabecera del ríu de La Mortera, llega a Colinas d’Arriba.

Sigue la carretera unos 350 metros hasta algamar un camín, a la esquierda, que cai hasta El Regueiru Viḷḷaverde. Más alantre’l Camín tuerce a la derecha y empata cola carretera, pela que sigue hasta les cases caberes de Porciles.

Ente les viviendes sal un camín que baxa, con rumbu suroeste, a El Ríu Porciles y encara depués la xubida per una matuca escontra Ḷḷavadoira.

Al salir a la carretera síguese per ella, a la esquierda, hasta L’Altu Ḷḷavadoira, llende ente los conceyos de Tinéu y Ayande. La marcha sigue pel camín que, de frente, con dirección sur, baxa a Ferrói.

Desque se pasa esti pueblu, empátase cola carretera AS-217. Síguese per ella unos metros a la derecha hasta la entrada d’un camín que s’abre a la esquierda y que, en cruciando’l regueru de Caleyu, vuelve atopase cola carretera. Siguiéndola a la esquierda, el Camín entra en La Puela.

La salida de la capital ayandesa faise pela avenida de Galicia y la so prolongación como carretera. Per ella síguese hasta’l paraxe de Fontelvira, unos 800 metros depués de la gasolinera. Equí empieza un camín a la esquierda que remonta’l valle d’El Ríu Nisón.

Pasa la traza xacobea per debaxo d’El Tesu, de Colobréu y de Penaseita, onde un esvíu a la derecha lleva al albergue de pelegrinos d’esi llugar. Faldiando, el Camín crucia La Reigada, y per un trechu abiertu nun argayu llega al calce d’El Ríu Nisón.

La xubida allárgase hasta atopar la carretera AS-14 y sigue de frente unos metros depués, a la derecha, per un camín con un ciszás inicial mui marcáu, hasta’l puertu d’El Palu.