La Espasa-Sebrayo

Un camín a la derecha lleva a la zona residencial d’El Barrigón, depués gárrase la nacional hasta l’altura del cruz a Gobiendes; equí retómase’l Camín vieyu un trechu. Vuelve producise un alcuentru cola nacional y, depués d’unos 300 metros per ella, un camín a la esquierda lleva a La Riega Güeñu, la xubida al llugar del mesmu nome y, yá convertíu en carretera, a Covián; síguese cuasi derecho con dirección oeste, hasta aportar a Colunga.

Crúciase la capital del conceyu pela cai Grande Covián pa baxar a El Ríu Lliberdón, travesar la N-634 y garrar la carretera de L’Infiestu, que se dexa a la derecha nel biforcu qu’hai a unos 200 metros.

Síguese de frente con dirección oeste pela vega d’El Ríu Llobones, pasando per La Calzada, El Tarrerón, la Ería de San Vicente y La Venta Peón pa dexar el valle desque se crucia la ponte de La Llorea.

Pela lladera de La Viesca, siguiendo la carretera, el Camín toca El Conyéu, forma La Cruz de Beldréu y baxa a Pernús. Sigue p’arriba per La Vega, onde se pue dexar la carretera y siguir pel camín orixinal que s’abre na vera esquierda y, con una xubida bien pindia, empobina pa La Llera.

Saliendo del colláu de La Cabañona, depués de travesar el caseríu de La Llera, el trazáu baxa hasta Priesca. En pasando la ilesia de San Salvador, déxase la carretera y sigue la baxada per El Caminón, que s’abre a la derecha. Cuasi acabando de baxar vuelve entroncase cola carretera que se dexó en Priesca y llégase a La Vega.

En pasando esta población, vuelve dexase la carretera y síguese, a la esquierda, pela vera derecha d’El Ríu Sebrayu hasta la vega d’El Ríu Ñabla, onde se tuerce a la derecha y apórtase, depués de cruzar la ponte vieya de Sebrayu, al llugar del mesmu nome, onde hai un albergue de pelegrinos.