Tol-Río de Seares

El camín principal desque se pasen Tol y A Granda sigue pela carretera que comunica El Esquilo con Campos y, a unos 300 metros al oeste d’El Río de Péligos, garra un esvíu a la esquierda que crucia Péligos y llega per As Campas y A Caleya a la carretera de Campuaberto.

Avánzase per ella, a la derecha, poco más de 100 metros y empieza la baxada a El Molín del Monte per una pista que s’abre a la esquierda. Na baxada crúciase cola pista que va al llugar d’A Berruga y sigue derecho hasta pasar al llau de les murueques d’El Molín del Monte y cruciar El Río de Berbesa.

Xúbese de frente, con dirección suroeste, per Faderne. Cuando la cuesta suaviza, entróncase con una pista que sigue la mesma dirección y desemboca nuna carretera que nos dexa cruciar fácil la vía del tren. A la derecha vuelve garrase’l Camín, que, calteniendo una dirección xeneral suroeste, va bordiando l’altu de San Marco hasta llegar a A Venta.

Desque se ta n’A Venta síguese per carretera hasta Lantoira, y per una pista con rumbu suroeste hasta llegar a Vilavedeye. A eso de la metá del pueblu empieza una pista, a la esquierda, que lleva a Vilar.

Sigue’l Camín, otra vez convertíu en carretera, per A Cruz, y per El Caleyón dos Lobos baxa a Riudesiares.