Arbas-La Romía de Arriba

Entá en tierres llioneses, la Colexata de Santa María d’Arbas, antaño dependiente de la Ilesia uviedina, ye un finxu d’importancia singular vinculáu estrechamente a la pelegrinación a San Salvador d’Uviéu y Santiago, que pue considerase guapamente como puntu de partida del Camín n’Asturies. La entrada de la ruta xacobea en territoriu rexonal faise pel boquete de La Calera, una colladina asitiada a unos 400 metros al norte d’El Puerto Payares. A él llégase per un senderu desdibuxáu que sal a la derecha de la carretera, metros depués de la colexata y que, con dirección noroeste y una trayectoria asemeyada a un tendíu eléctricu, xube al altu de La Gobia y al boquete de la Calera. O bien, siguiendo la carretera hasta poco primero del Parador de Payares, onde se garra un camín qu’ente les cases, a la derecha, lleva al mesmu sitiu.

Yá na divisoria provincial, empieza la baxada llarga hasta El Río Payares pela vaguada de Tibigracias, onde la buelga del Camín ye malpenes perceptible hasta llegar a la N-630. Síguese pela carretera unos metros a la derecha hasta la entrada d’una pista, a la esquierda, qu’empobina a El Quentu la Capillona. Torciendo a la derecha síguese cuasi pel cume d’esta estribación unos 1000 metros, qu’en pasándolos el Camín cai pela vaguada meridional hasta llegar al alcuentru d’una pista.

De frente llégase a Samiguel del Río y per Viḷḷar y Las Covaratas a La Romía. Tamién s’usa un itinerariu de percorríu más fácil que dende Samiguel tira a Santa Marina, Chanos y desemboca en Fierros, pero que nun tien vinculación col pelegrinaxe. Sí tien una resonancia xacobea clara l’antigua villa de Payares, localidá na que, polo menos dende dómina moderna, funcionaba un hospital de pelegrinos. Pa llegar a ella ha siguise pela pista indicada enantes, a la derecha, hasta entroncar cola carretera y depués per un camín que s’abre a la esquierda pa llegar a la vieya cai real.

A la salida de Payares síguese pela N-634 nunos 2,6 quilómetros, llegando, en pasando Floracebos, a la capiya de la Virxe de las Nieves. Equí déxase la carretera y gárrase’l camín que s’abre a la derecha y lleva a La Romía Riba.