Berducedo-Padraira

De Berducedo, pueblu con tradición hospitalaria que conserva vestixos d’ello, el camín sal n’acabando les cases escontra la esquierda, xubiendo suavemente hasta la ilesia d’A Mesa, que desiguida s’acolumbra allalantrones.

A la derecha de la ilesia d’A Mesa sal una pista asfaltada que xube hasta’l pueblu de Buspol, onde s’atopa una casa, que foi antaño hospital de pelegrinos, énte una capiyina.

Delantre de la capiya, el camín baxa, faciendo ciszás a lo llargo d’una cuestona empinada hasta l’agua de la presa, que debaxo d’ello ta la ponte vieya y el pueblu de Salime. La baxada ye impresionante, teniendo como fondo l’agua embalsao d’El Río Navia.

Pola mor del embalsamientu del agua, dende’l puntu de llegada del camín hai que recular unos metros pa garrar a la derecha’l camín real que nos lleva a la presa, per onde se pue cruciar El Río Navia.

Dende’l muriu de la presa, el camín sigue’l trazáu de la carretera, que crucia lo que yera’l pobláu que se llevantó pa los obreros qu’edificaron la obra hidráulica, güei abandonáu dafechu. A trés quilómetros, xunto a una ponte y a un depósitu pequeñu d’agua, gárrase un camín a la derecha qu’evita les últimes curves de la carretera, volviendo a retomala unos 500 metros primero d’entrar en Grandas de Salime.

Namás entrar na villa de Grandas atópase lo que yera la casa-hospital de pelegrinos. Dende ellí y xubiendo llégase a la ilesia de San Salvador, qu’arrodia’l camín pela parte posterior hasta volver a la carretera, pa depués garrar un camín mui guapu hasta A Farrapa, onde la carretera lleva hasta Cerexeira, dende onde sal a la derecha’l camín que llega a Malneira.

El camín crucia pel mediu del llugar de Malneira y dende él llueu s’acolumbra’l pueblu de Castro, que traviesa, cerca del castru d’El Chao Samartín y del so centru d’interpretación. Xunto a la capiya de Castro, y ente les cases del pueblu, sal el camín que, faldiando’l monte a media lladera, lleva hasta la capiya de San Lázaro, restu testimonial d’una antigua malatería y al pueblu de Padraira.