Campomanes-Pola de Lena
Etapa 14 Campomanes (Lena) - Pola de Lena (Lena) 6 km
Recorrido
Pasa’l Camín pela cai principal de Campumanes; a la so derecha queden la capiya del Santu Cristu, vinculada a lo que yera l’hospital de pelegrinos, y la ponte vieya pela que la ruta xacobea salvaba El Río Güerna. Dende ella, el trazáu resulta coincidente cola AS-242, la carretera vieya de Castiella de Xovellanos.
Per ella síguese, ensin esviase, hasta llegar a Uxo, yá nel vecín conceyu de Mieres. Señalen el pasu del Camín nesti trayectu los llugares de La Vega’l Rei, La Vega’l Ciigu y La Pola, capital del conceyu.
Folklore & Tradiciones
El platu por escelencia nel conceyu de Ḷḷena ye’l corderu a la estaca. El Prau Ḷḷagüezos, na llende de Ḷḷena y Quirós, acueye’l primer domingu de xunetu la so exaltación gastronómica y festiva cola fiesta del Corderu, declarada d’Interés Turísticu Nacional. Una bona muestra de convivencia ente los dos conceyos que s’hermanen al golor d’un bon asáu y al son de la música tradicional de la romería.
Otres variedaes del corderu, como la caldereta o l’asáu, amás del cabritu, el pote de berces o les menestres integren la muestra gastronómica d’esta zona del monte central asturianu. Y a ello hai que sumar el pan d’escanda y, n’apartáu de repostería, los borrachinos, l’arroz con lleche o’l quesu d’Urbiés, un quesu artesano clásico, ellaborao con lleche de vaca, y que, pol so sabor tan fuerte hai que lo prebar en cantidaes pequeñes.
Nel capítulu festivu, el conceyu de Ḷḷena presenta una ufierta variada na que, amás de la fiesta del Corderu, inclúyese la de la Escanda o la de la Flor. La primera, pa celebrar n’agostu, dedícase a esti cereal colo que se prepara artesanalmente’l pan típico d’aquella zona. La romería popular de la Flor desenvuélvese nel mes d’abril al llau de la capiya de la Virxe de la Flor en Piedracea. Nella nun falten la sidra, les empanaes y los bollos preñaos y el son de la gaita.
Destaquen, amás, les Xornaes de la Castañal qu’entamen los hosteleros de la capital ḷḷeniza, La Pola, la tercer selmana de payares y onde se tastia pote de castañes, dulces y llicor ellaboraos coles castañes recoyíes na zona. Na celebración d’estes xornaes distínguese cola "Castañal de Ḷḷena" a dalgún personaxe vinculáu al conceyu.