La Caridad-Tol

Sigue’l Camín pelo que yera la nacional hasta les últimes cases d’A Caridá, onde la dexa, nuna curva mui zarrada, pa baxar hasta cruciar El Río de Vío.

La xubida siguiente vuelve llevar a la N-634. Pásase y gárrase una carretera a la esquierda que lleva a Os Carbayóis, Os Pradóis y sur de San Polayo, pa llegar a Valdepares, dende onde’l Camín va siguir pela carretera d’El Franco. Empieza equí la baxada al valle del Porcía per El Muriyo y A Canteira.

Desque se vuelve cruciar la N-634, la ruta lleva a la capiya d’Os Romedios, que dexa a la derecha, y incorpórase a lo que yera la nacional pa pasar el ríu, estremu ente los conceyos d’El Franco y Tapia.

Recupérase’l trazáu del camín primitivu a l’altura de l’antigua venta de Porcía, dende onde xube per una pista asfaltada hasta’l barriu de Louteiro y, d’equí, a A Caleya.

A l’altura de les escueles un ramal del Camín tira pa Tapia, onde hai albergue de pelegrinos, y otru, el principal, empobina en dirección suroeste escontra El Picón, travesando la N-634; per él síguese.

Nos cinco quilómetros vinientes, el Camín crucia la rasa costera con dirección xeneral suroeste, ensin tocar nenguna población, coincidiendo en bona parte del percorríu con una pista de concentración parcelaria. Pasáu El Picón, el Camín sigue de frente, al suroeste, hasta entroncar cola carretera de San Xuyán, que se sigue, a la esquierda, a lo llargo de 250 metros. Gárrase la pista que s’abre a la derecha, pela que se sigue, desque se crucia la carretera de Mántaras a A Roda, hasta llegar a El Río d’Orxales, onde tán As Pontes del Cabiyón, y el paraxe d’El Coutao.

A partir d’equí’l trazáu vieyu desapaeció, polo que ye menester dar un rodéu pequeñu que lleva a Brul y depués allégase, pa volver al Camín, hasta Barrionovo, onde s’enllaza cola AS-31, pela que se va cruciar Tol, pasando al llau del albergue de pelegrinos, y A Granda, onde se dexa esta carretera pa garrar la qu’empieza a la derecha con destín a El Esquilo.

Per un trazáu asemeyáu al d’estes carreteres nueves (AS-31 y CP-1) llegaben los pelegrinos d’antaño a As Figueiras y Castropol, respectivamente, na oriella derecha de la Ría del Eo, onde había y hai, estacionalmente, serviciu de barcaxe pa cruciar a Ribadeo.