Llanorrozo-Villademoros

Nesti puntu, el caminante podía escoyer tamién por siguir el camín de Las Vaḷḷoutas, un itinerariu más modernu que pon en comunicación los núcleos de Valdréu, Albuerne, Nuviana, Castañeras, Vaḷḷouta y Tablizu, cruciando los regueros y ribayos qu’hai ente ellos, conectando col qu’equí se sigue a l’altura de Cadavéu.

El camín de Las Palancas xube per La Cuesta la Ventana hasta’l monte del mesmu nome y sigue, con dirección suroeste, hasta La Sierra y El Llanu la Paya, onde’l camín fai de raya ente los conceyos de Cuideiru y Valdés.

N’acabando’l llanu, xube pa dir curiando los picos de La Perina y Montagudu, dexando a la derecha dellos caminos con destín a Montagudu y Resiellas, y cai suave al colláu de Las Ventas, cruciando la carretera.

De frente, con dirección oeste, el Camín dexa a la derecha’l picu de Los Güesos; tuerce al suroeste y, ensin baxar, llega a la base d’El Picu Cabornín. Encara la xubida, con esa mesma dirección, curiando la so falda meridional hasta llegar al colláu d’Outar de Muyeres y, más alantre, al d’El Pocín.

Equí coincide con dellos caminos que baxen peles lladeres y hai que siguir pel que, con rumbu oeste, sigue la xubida dexando a la derecha l’altu de Las Cougruzas y el de les peñes d’El Boláu, y a la esquierda’l picu de Paradieḷḷa, el de más altor de La Sierra las Palancas.

El Camín baxa pel llau septentrional del cordal escontra’l colláu de Rodieḷḷa, onde cai en ciszás pela lladera y llega hasta Las Estadas Nuevas, parte final de Las Palancas que lleva a San Playu de Teona.

Dende equí sigue’l trazáu hasta cruciar la carretera de Cortina a Cadavéu y pasar a la lladera opuesta, la del monte Ḷḷamas, que se va curiando escontra’l norte nuna baxada poco a poco hasta llegar a Viḷḷamouros, n’onde algama la N-632.