Villademoros-Luarca

Asset Publisher

Etapa 14 Villademoros (Valdés) - Luarca (Valdés) 14,3 km

Recorrido

El Camín sigue al otru llau de la carretera con rumbu oeste, pasando per Cuetu, La Cruz y La Venta. De la que pasa, dexa atrás un montón de cruces pelos que nun s’hai qu’esviar, teniendo que siguir la orientación xeneral del Camín a poniente.

El trazáu crucia El Chanu, baxa a El Ventorrillu, y remonta hasta la ilesia de San Miguel de Caneiru, onde empieza la baxada al valle del Esva, que’l so ríu resálvase pela ponte de la N-634; síguese unos 500 metros hasta llegar a una curva zarrada. Antaño, el pasu facíase en barca; caltiénse a la derecha de la carretera la llamada Casa’l Barcu, onde se daba esti serviciu.

Báxase pel regueru d’El Forcón y xúbese pela lladera opuesta en sen suroeste, llegando a la llanada onde tán El Barreiru y La Casina’l Monte, esbarrumbada, puntu onde’l Camín cai a la vaguada del regueru de Ricante conectando col trazáu de lo que yera la N-634. Síguese hasta un esvíu a la derecha que lleva a Barcia.

El trazáu orixinal atraviesa El Cruceiru y sal pel barriu de La Cruz camín d’El Fondón de La Madalena, pa xubir per El Mingón a Barceḷḷina. Enllázase equí cola carretera del faru, que se sigue per Viḷḷar y Torraltina, y torciendo a la esquierda pela cai de La Carril llégase al barriu de La Puerta la Viḷḷa p’adientrarse en Ḷḷuarca.

Folklore & Tradiciones

Como nun podía ser menos nesti percorríu pela costa occidental asturiana, el conceyu de Valdés destaca na so ufierta gastronómica una bayura grande de pescáu y mariscu del Cantábricu. Ente los platos singulares, la calderada compuesta por botones, sargos y saramolletes guisaos con pataques. Y xunto a ello, los calamares de Ḷḷuarca, la merluza na chapa, la llubina al fornu, los chipirones rellenos, el besugu y toa clas de mariscos como llagostes, centollos, amasueles, percebes o oricios. N’apartáu de productos de la tierra hai que mentar los embutidos artesanales, el pitu caleya, la verdura y les setes. El ramu pónenlu’l recuperáu quesu Valdesano y lo de Trevías, amás del arroz con lleche, los frixuelos, el requesón vaqueiro y los pasteles.

Atopámonos nun conceyu enllenu de cites festives perinteresantes. La so capital, Ḷḷuarca, ufierta, ente otres munches, les fiestes de la Virxe del Rosariu, el 15 d’agostu (declarada d’Interés Turísticu Nacional), y la de San Timoteo, el 22 d’esi mesmu mes. La primera ye fiesta propia de los homes de la mar y empieza la nueche enantes col cantu tradicional d’habaneres pa rematar cola procesión marinera. Les fiestes de San Timoteo, pela so parte, axunten na villa ḷḷuarquesa a munchu públicu naguando por gozar d’una romería que dura una selmana. Otres dos fiestes de significación singular nel conceyu son la fiesta Vaqueira o Vaqueirada, na braña d’Aristébanu, l’últimu domingu de xunetu y que ta considerada como fiesta d’Interés Turísticu Nacional, y La Regalina, en Cadavéu, romería d’un sabor asturianu claru catalogada d’Interés Turísticu Rexonal.

Alojamiento