Oviedo-Valsera

El Camín sal de la plaza d’Alfonso II, énte la catedral, saliendo del cascu urbanu peles actuales cais de San Xuan, La Lluna, Cuadonga, Melquíades Álvarez, Independencia y L’Argañosa. Enllaza, de siguío, desque se crucia la vía del tren per una pasarela, cola cai Alfonso I el Católicu y traviesa la urbanización recién de La Florida hasta retomar el Camín Vieyu, güei asfaltáu, n’El Pontón de Riello.
Per esta carretera llégase a San Llázaro Paniceres y a Les Campes, onde se dexa, garrando un esvíu a la derecha que lleva, faldiando, hasta Llampaxuga. El Camín pasa per delantre de la capiya d’El Carme y baxa escontra’l regueru d’El Bo y el llugar de La Pipera, llegando a la carretera que, a la derecha, lleva a Lloriana.
Dexando a la esquierda la ilesia de Santa María, el Camín baxa hasta La Bolguina, y entronca asina cola carretera AS-232 (Uviéu-L’Escampleru), pela que se sigue, a la derecha, hasta resalvar El Río Nora pela medieval Ponte de Gallegos y dexar atrás les últimes cases del llugar de Gallegos. Gárrase equí un esvíu a la derecha pa entrar n’El Castañéu del Soldáu y llegar depués, cuasi en paralelo a El Río Nora, al llamáu Molín de Quintos, dende onde xube per La Carrilona hasta volver algamar l’AS-232 na redolada de La Venta.
En llegando al encruz cola carretera de Trubia (AS- 233), síguese per ella, a la derecha, unos 100 metros. Nel biforcu siguiente gárrase la carretera AS- 234, a la esquierda, con dirección a Santuyanu. Pásase al llau de la ilesia de Santa María y del albergue de pelegrinos de L’Escampleru. Unos 400 metros depués déxase la carretera pa garrar un esvíu a la esquierda que traviesa Taraniellu, pasa per delantre de La Rectoral y vuelve salir a la carretera AS-234, pela que sigue, a la esquierda, hasta la capiya de Santa Fátima de Valsera.