Valsera-Grado

Desque pasada la capiya, el Camín apártase de la carretera rexonal AS-234 y tuerce a la esquierda. Pasa ente les cases de Valsera y sigue, a la derecha, per una pista asfaltada que lleva a La Rabaza. Llégase depués a Picarín y, con dirección suroeste, síguese hasta enllazar cola carretera que, de frente, conduz a Premoñu.
Unos 400 metros depués de la capiya de Santa Ana de Premoñu, gárrase un camín que s’abre a la derecha y baxa contra Ardaxe. Bordiando la vega de Valdunu sigue con dirección norte a La Fonte, onde pon dirección oeste hasta enllazar cola carretera de Valdunu, que se sigue, a la derecha, pa llegar a Paladín y, resalvando El Ríu Sotu, síguese a la esquierda, escontra Puerma.
N’El Fornu déxase la carretera pa garrar una pista, a la esquierda, que va contra la minicentral de Valdunu II. Sigue’l Camín de frente paralelu al Nalón, pasa la casería de Carril, crucia’l regueru de La Xana per una pasarela de madera y sigue bordiando’l ríu hasta enllazar cola carretera AS-234, pela que s’avanza hasta resalvar el Nalón pela ponte de Peñaflor.
El tramu siguiente coincide cola carretera N-634 hasta atopar un esvíu a la derecha que s’adientra na localidá de Peñaflor. En pasando baxo la vía del tren, traviesa la vega del mesmu nome con dirección a Grau, per una pista que sustituye al trazáu orixinal interrumpíu en dellos puntos.