Siero-Granda
Etapa 21 Siero (Siero) - Granda (Siero) 10,1 km
Recorrido
Desque se crucia’l cascu urbanu de La Pola Siero, entróncase colo que yera’l trazáu de la N-634; déxase a la derecha la carretera que va per Forfontía a Noreña y, cuasi 400 metros depués, gárrase un esvíu a la derecha que lleva a La Carrera. Avánzase en dirección suroeste y báxase a El Berrón. Pela avenida d’Uviéu y la de Los Campones el Camín sal escontra Carbayal, onde llega desque se resalva l’autovía per una pasarela. Más alantre atópase cola carretera de Llangréu (AS-17), pela que, poniendo tola atención, ye menester siguir unos metros a la derecha hasta embocar la carretera que, a la esquierda, lleva a Fonciello.
Sigue’l trazáu xacobéu escontra Meres, bordia’l zarru de la escuela y xube a la llomba onde ta’l palaciu de los Argüelles. Ensin perder el rumbu a poniente, crucia la carretera de Tiñana (SI-6) y la vía del tren; de siguío traviesa El Campu y llega a Granda.
Folklore & Tradiciones
La tradición gastronómica del conceyu de Siero atópase nuna típica cocina casero de lo que s’obtienen especialidaes relatives a embutíos y a la preparación de platos con derivaos de carne de vacuno o porcino, como los callos, la llingua embuchao o les molleyes. Tamién son típiques n’époques festives la tortiella de sardines salones, la de migaya de pan y les empanaes. El ramu dulce van ponelu frixuelos, picatostes, borrachinos y tortos de farina de maíz, ente otros. Una de les peculiaridaes d’esti conceyín asturianu ye la montonera de fiestes y romeríes que reparte ente les parroquies a lo llargo l’añu. Anque trés d’elles lleven la fama: la fiesta de los Güevos Pintos, que se festexa’l martes de Pascua; la fiesta de les Comadres, y el Carmín de La Pola. La primera ta declarada d’Interés Turísticu Nacional dende 1968 y consiste na esposición y venta de güevos pintaos artesanalmente. A esto axúntense’l folklore y la romería asturiana. La fiesta de les Comadres, pela so parte, celébrase’l xueves anterior al domingu d’antroxu, y aconceya a les muyeres nuna cita de calter gastronómicu bien marcáu. P’acabar, el Carmín de La Pola o "Romería d’Asturies", el llunes siguiente a la celebración de la Virxe del Carme’l 16 de xunetu.
Alojamiento
- H*** Lóriga (Pola de Siero)
- H** Samoa (El Berrón)
- H* San Román (Granda)
- HS** La Curva (La Braña)