Asset Publisher

Etapa 15 Luarca (Valdés) - La Colorada (Navia) 10,25 km

Recorrido

El Camín sal de Ḷḷuarca, pela cai de La Peña, algamando El Chanu. Con rumbu suroeste tira pa L’Outeiru, baxa hasta El Ríu del Oḷḷa y empobina a Taborcías, dende onde, desque se pasa una ponte perriba de la vía del tren, sigue per La Calea hasta Viḷḷuír.

Crucia la N-634 y avanza con esi mesmu rumbu otros 500 metros, qu’en pasándolos gárrase un esvíu pa la derecha. El trazáu sigue pel sur de Las Pontigas, Ca Manteca y norte de La Fervencia pa, pel pie del monte d’El Picu Queimáu, travesar Cabornas, La Pedrera, La Casona, El Reḷḷón y Los Romedios.

La ruta xube el colláu de Sangunientu, al noroeste de Los Romedios, traviesa la vaguada de Riumayor y, desque se crucia la carretera de Boronas, xube a La Barraca. Avanza escontra l’oeste ente El Monte Faru y L’Infernón y baxa a lo que yera la nacional. A la esquierda va pasar, yá nel conceyu de Navia, per El Vau hasta Viḷḷeirán.

De Viḷḷeirán el Camín baxa con sentíu noroeste a Viḷḷapedre y llega al llugar de La Pena, dende onde en baxada suave algama El Río de Frexulfe.

Desque se pasa’l ríu, el trazáu xube a Piñeira, crucia la N-634 y un pasu perriba de la vía de FEVE; cuasi 300 metros depués llega a una encruciyada. El Camín sigue de frente pero más tarde’l tránsitu vese estorbáu pola vía, la N-634 y una parte enllamorgada, polo que ye aconseyable, nel cruz, garrar el camín que, a la derecha, allégase al albergue de pelegrinos de Piñeira, salir a la nacional y siguir per ella hasta la primer esviadura a la derecha que, pel norte de Villouril y, en dirección oeste, lleva per un tramu asfaltáu, a La Venta y La Colorada.

Folklore & Tradiciones

Navia ufierta a los pelegrinos otra cita col bon comer de la cocina marinera. Marmitacos y calderetes xúntense a les parrillaes de mariscu, la llubina con verdura, les cocoches de merluza con amasueles y los pimientos rellenos de mariscu pa nun dexar nengún comensal indiferente. La cocina naviega tamién nos dexa caldeirada y corderu asao. N’apartáu de postres destaca la venera, una especie de tarta d’almendra creada n’alcordanza del pelegrinaxe xacobéu, y xunto a ella’l requesón con miel y los frixuelos rellenos de crema. N’El Franco combínase la cocina de mar y tierra. Así qu’a los tan mencionaos platos marineros xúntense equí la fabada, el pote, les parrillaes de corderu, les empanaes o los callos. El ramu siguen poniéndolu la venera, el requesón, l’arroz con lleche y los frixuelos.

Una de les principales cites festives de Navia ye’l Descensu Internacional a nadu de la ría de Navia, que se celebra n’agostu. Trátase d’una fiesta declarada d’Interés Turísticu Nacional, a la que van deportistes nacionales y internacionales. Y, por cuenta d’esta cita, la capital del conceyu celebra munchos actos folklóricos qu’axunten a mil y milenta persones. Señalaes tamién nel calendariu de celebraciones de Navia atópense nel mes d’agostu la fiesta de La Xira (comida campestre en Veiga d’Arenas) y la de la Virxe de la Barca. Y en setiembre hai que reseñar la fiesta de Las Telayas, n’honor a la Virxe de la Telaya, que remata cola xira a Frexulfe.
Polo que se refier al conceyu d’El Franco, destaca la Muestra Folklórica Internacional del mes de setiembre y la Concentración de Motos nel mesmu mes.

Alojamiento

  • Albergue de Peregrinos de Piñera (Navia)
  • H** Casa Consuelo (Otur)
  • H** Riomayor Palace (Otur)
  • H** El Rocío (Otur)
  • H*** Blanco (La Colorada)
  • H** La Kabaña (La Colorada)
  • H* El Pinar (Villapedre)
  • CA Casa Fonso (Villapedre)
  • C2ªC Playa de Otur